ᐋᓐᓂᐊᕕᐅᑉ ᐃᓗᐊᓂ ᐋᓐᓂᐊᑖᕆᐅᓲᑦ ᓇᓗᓀᕐᑕᐅᒪᓂᖃᓱᖑᕗᑦ ᐃᒻᒪᓇᕐᑑᒋᐊᖏᑦ ᑲᒪᒋᔭᐅᔪᖃᑐᐊᕐᒪᑦ ᐋᓐᓂᐊᕕᒻᒥ, ᓇᓃᓂᐊᕋᓗᐊᕐᐸᑦ ᑲᒪᒋᔭᐅᓂᖓ.
ᐋᓐᓂᐊᕕᒻᒥ ᐃᒻᒪᓇᕐᑐᐃᑦ ᓇᓗᓀᕐᑕᐅᒪᓂᖃᕐᐳᑦ ᑌᒣᓕᔭᐅᔪᖃᑐᐊᕐᒪᑦ ᐋᓐᓂᐊᕕᒻᒧ ᑲᒪᒋᔭᐅᔪᖃᕐᓯᒪᓕᑐᐊᕐᒪᑦ ᓇᓪᓕᑐᐃᓐᓇᖏᓐᓂ ᐋᓐᓂᐊᓐᓂ.
ᐋᓐᓂᐊᕕᐅᑉ ᐃᓗᐊᓂ ᐃᒻᒪᓇᕐᑐᐃᑦ ᑐᕃᓐᓇᑐᒥᒃ ᓱᕐᕃᓂᖃᓲᖑᕗᑦ ᐃᒻᒪᓯᒪᔪᓂᒃ, ᐃᓚᖏᓐᓂᓗ ᐊᒻᒪᓗ ᓄᓇᓕᓐᓂ. ᑕᒪᒃᑯᐊ ᓄᐃᑦᓯᒍᓐᓇᓲᑦ ᐃᓄᑑᓕᕐᑎᓯᓚᕿᑦᓱᑎᒃ, ᐋᓐᓂᐊᓇᕐᑐᓂᒃ, ᐊᑯᓃᕐᑐᑯᑦ ᐱᕐᖃᔭᑦᓯᐊᖏᓐᓂᓂᒃ, ᐊᑯᓂᓗ ᐋᓐᓂᐊᕕᒻᒦᑎᑦᓯᒍᓐᓇᓱᑎᒃ, ᐱᓇᓱᖕᖏᑑᓚᕿᓂᕐᒥᒃ, ᑮᓇᐅᑦᔭᓴᖕᖏᑑᓚᕿᓂᕐᒥᓗ ᐊᒻᒪᓗ ᐃᓚᖓᓂ ᐃᓅᒍᓐᓀᕈᑎᐅᓲᖑᓱᓂ. ᐋᓐᓂᐊᕕᓐᓄᓕ, ᑕᒪᒃᑯᐊ ᐊᓐᓂᐊᕕᐅᑉ ᐃᓗᐊᓂ ᐃᒻᒪᓇᕐᑐᐃᑦ ᐅᓄᕐᓯᓕᐅᒥᑎᑦᓯᒍᓐᓇᓲᑦ ᐋᓐᓂᐊᕕᓕᐊᑲᑦᑕᑐᓂᒃ, ᑮᓇᐅᔭᕐᑐᕈᑎᐅᓂᕐᓴᐅᓲᖑᑦᓱᓂᓗ ᓱᓇᒐᓓᑦ ᓂᐅᕕᕐᑕᐅᒋᐊᖃᓕᑐᐊᕐᒪᑕ ᐊᒻᒪᓗ ᐋᓐᓂᐊᓯᐅᑎᒋᐊᓪᓚᓂᒃ, ᐊᒻᒪᓗ ᐱᓇᓱᑦᑏᑦ ᐱᓇᓱᒋᐊᖃᕐᓂᓴᐅᓚᕿᑦᓱᑎᒃ. ᑕᒪᒃᑯᐊ ᐱᓂᐊᕐᓃᑦ ᐃᒻᒪᑎᑦᓯᑌᓕᕐᒨᓕᖓᔪᑦ ᐊᐅᓚᑦᓯᓂᕐᒧᓗ ᐃᒻᒪᓇᕐᑐᓂᒃ ᑌᒣᒻᒪᑦ ᐱᐅᔫᖃᕐᐳᑦ ᐃᓗᓐᓀᓄᑦ.
ᓄᓇᕕᒻᒥ ᐃᓗᓯᓕᕆᔩᑦ ᑲᑎᒪᔨᖏᑦ ᐊᑐᕐᓂᖃᓲᖑᕗᑦ ᓴᐳᒻᒥᔨᐅᑦᓱᓂ ᐋᓐᓂᐊᕕᒻᒪᕆᓐᓂᒃ.
ᐃᑲᔪᕐᓯᒪᐅᑏᑦ ᐃᒻᒪᑎᑦᓯᑌᓕᒪᓂᕐᒧᑦ ᐊᐅᓚᑦᓯᓂᕐᒧᓗ ᐃᒻᒪᓇᕐᑐᓂᒃ ᐋᓐᓂᐊᕕᓐᓂ ᐊᒻᒪᓗ ᐊᑯᓂ ᑲᒪᒋᔭᐅᓲᓂᒃ ᐱᑦᔪᔨᕕᖏᓐᓂ
ᑐᕌᒐᖏᑦ
- ᓴᐳᑦᔨᓯᒪᓗᒋᑦ ᐋᓐᓂᐊᕕᓕᐊᕐᓯᒪᒧᑦ ᐃᒻᒪᓇᕐᑐᑖᕐᑎᑦᑌᓕᓗᒋᑦ ᐊᒻᒪᓗ ᖁᐱᕐᕆᓇᕐᑐᓂᑦ ᑲᒪᒋᔭᐅᓂᖃᕐᑎᓗᒋᑦ.
- ᐁᑦᑑᑎᐅᑎᑦᓯᑌᓕᓗᓂ ᐃᒻᒪᓇᕐᑐᓂᒃ ᐱᓇᓱᑦᑎᓄᑦ, ᐳᓛᕐᑐᓄᓪᓘᓃᑦ ᐃᓚᖏᓐᓄᓘᓐᓃᑦ.
ᐋᓐᓂᐊᕕᓕᐊᕐᓯᒪᔪᒥᒃ ᐃᒻᒪᓯᒪᔪᓕᕆᔭᐅᓂᖓᓄᑦ ᐃᑲᔪᕐᓯᒪᐅᑏᑦ ᑲᒪᒋᔭᖃᓲᑦ ᒪᑯᓂᖓ ᐱᖓᓲᔪᕐᑐᓂᒃ ᐃᒣᓕᖓᔪᓂᒃ:
- ᑲᒪᓇᓱᑦᑕᐅᔪᖃᕐᑎᓗᒍ ᐋᓐᓂᐊᕕᐅᑉ ᐃᓗᐊᓂ ᐃᒻᒪᓇᕐᑐᖃᓕᕐᒪᖔᑦ ᐃᑉᐱᒋᔭᖃᕐᓗᓂᓗ ᐃᒻᒪᓇᕐᑐᓄᑦ ᐱᓀᓗᑌᑦ ᓄᐃᖃᑦᑕᓂᖏᓐᓂᒃ;
- ᑐᕌᒐᕐᓂᒃ, ᐊᑑᑎᔭᐅᓲᓂᓪᓗ ᓴᐳᒻᒥᒍᑎᓂᓪᓗ ᐃᒻᒪᑌᓕᒪᑎᑦᓯᓂᕐᒧᑦ ᐊᐅᓚᑦᓯᓂᕐᒧᓗ ᐃᒻᒪᓇᕐᑐᓂᒃ;
- ᐃᓕᓐᓂᑎᑦᓯᓂᕐᒥᓗ ᐱᒋᐅᕐᓭᓂᕐᒥᓗ;
- ᓇᓗᓀᔭᕐᑕᐅᔪᖃᕐᑎᓗᒍ ᐊᓐᓂᐊᕕᓕᐊᕐᓯᒪᔪᐃᑦ ᐃᒻᒪᓯᒪᔪᓕᕆᔭᐅᓂᖏᓐᓄᑦ ᐃᑲᔪᕐᓯᒪᐅᑎᖏᓐᓂᒃ;
- ᐅᖄᖃᑦᑕᓗᓂᓗ ᑐᑭᓯᒪᐅᑎᑦᓴᓕᕆᓗᓂᓗ;
- ᑲᒪᒋᔭᖃᕐᓗᑎᒃ ᐃᒻᒪᓇᕐᑐᐃᑦ ᓄᐃᑲᑦᑕᓂᖏᓐᓂᒃ.
ᑲᒪᓇᓱᓐᓂᒧᑦ
Methicillin-Resistant Staphylococcus aureus (MRSA) (ᐋᓐᓂᐊᕆᔭᐅᒍᓐᓇᑐᖅ)
Staphylococci ᖁᐱᕐᕈᑯᓗᑦᓱᓂ ᓇᓂᔭᐅᔪᖃᕈᓐᓇᓲᖑᕗᖅ ᐊᓂᕐᑎᕆᔪᐃᑦ ᐅᕕᓂᖏᓐᓂ ᐅᕝᕙᓘᓐᓃᑦ ᓱᕐᓗᖏᓐᓂ. ᐅᓪᓗᐃᑦ ᖄᖏᕐᑎᓗᒋᑦ ᐊᒻᒪᓗ ᐋᓐᓂᐊᓯᐅᑏᑦ ᐊᑐᕐᑕᐅᓂᕐᓴᐅᖃᑦᑕᓕᕐᓂᖓᓄᓪᓗ, ᑕᒪᓐᓇ Staphylococcus aureus ᐋᓐᓂᐊᖑᔪᖅ ᓱᕐᕋᑕᐅᕐᖃᔦᓯᓲᕈᓚᐅᔪᕗᖅ ᑕᒪᒃᑯᓄᖓ ᐊᑐᕐᑕᐅᓂᕐᐸᐅᓲᓄᑦ ᐊᓐᓂᐊᓯᐅᑎᓄᑦ, ᒪᑯᓄᖓᓗ semi-synthetic penicillin ᒪᑯᐊ methicillin. ᑕᒪᓐᓇ ᖁᐱᕐᕈᑯᓗᒃ ᐁᑦᑑᑎᐅᒍᓐᓇᓲᑦ ᐋᓐᓂᐊᕕᓕᐊᕐᓯᒪᔪᒥᑦ ᐱᑦᓱᓂ ᐊᓯᐊᓄᑦ ᐋᓐᓂᐊᕕᓕᐊᕐᓯᒪᒻᒥᔪᒧᕐᑕᐅᓱᓂ ᐱᓇᓱᑦᑏᑦ ᐊᒡᒐᖏᑦᑎᒍᑦ ᐅᕝᕙᒣᑦᑐᓄᑦ.
ᓄᓇᓕᓐᓂᑦ ᐱᔭᐅᓲᖑᓂᖏᑦ ᐅᓇ MRSA (CA-MRSA) ᐊᑦᔨᒋᔭᐅᖏᑑᒍᑎᖃᓲᖅ ᑕᒪᑦᓱᒪᖕᖓᑦ MRSA ᖁᐱᕐᕈᑯᓗᖓᓂᑦ ᓱᕐᕋᑕᐅᓲᖑᒍᓐᓀᓂᑯᖏᓐᓄᑦ (ᑲᓚᓐᓇᑐᓂᒃ ᐃᒻᒪᓇᕐᑐᑖᕐᓯᒪᓂᕐᒥᒃ) ᐊᒻᒪᓗ ᑎᒃᑯᐊᑕᐅᒪᓂᖃᕐᑐᓂᒃ ᐃᓄᓐᓂᒃ (ᓯᕗᓂᐊᒍᑦ ᐊᓐᓂᐊᕕᓕᐊᕐᓯᒪᖕᖏᑐᓂᒃ).
Vancomycin-Resistant Enterococcus (VRE)
Enterococci ᖁᐱᕐᕈᑯᓘᕗᖅ ᓇᓂᔭᐅᒍᓐᓇᓲᖑᑦᓱᓂ ᐃᓅᑉ ᐃᕐᕋᕕᖏᓐᓂ ᐊᓇᖏᓐᓂᓗ ᐅᕝᕙᓘᓐᓃᑦ ᖁᐃᒍᑎᖏᓐᓂ. ᐃᓗᓐᓈᒍᑦ, ᑕᒪᓐᓇ enterococci ᐃᒻᒪᑎᑦᓯᓲᖑᑦᔭᖏᑦᑐᖅ ᐃᓄᑑᓈᕐᑎᑐᐃᑦ ᐊᑯᓐᓂᖏᓐᓂ ᖃᓄᐃᖏᓯᐊᕐᑑᑐᐊᕐᒪᑕ. ᐃᓚᖓᓂ ᖁᐃᒍᑎᒃᑯᑦ ᐃᒻᒪᓇᕐᑐᑖᓲᑦ, ᐃᕐᐸᑎᑦᓯᓱᓂᓗ ᐃᒻᒪᓇᕐᑐᓂᒃ ᐊᒻᒪᓗ ᐃᓚᖓᓂᑦᓴᕋᑕᕐᓗ ᐊᐅᒃᑯᑦ ᐃᒻᒪᓇᕐᑐᑖᕐᓱᓂ. ᑕᒪᒃᑯᐊᓕ VRE ᖁᐱᕐᕈᑯᓘᕗᖅ ᓱᕐᕋᑕᐅᕐᖃᔭᓲᖑᒍᓐᓀᓱᓂ ᐊᒥᓱᒐᓚᓐᓄᑦ ᐋᓐᓂᐊᓯᐅᕈᑎᓄᑦ, ᐃᓚᖃᕐᑐᒥᒃ vancomycin-ᒥᒃ. ᑕᒪᓐᓇ VRE ᐃᒻᒪᑎᑦᓯᓲᖑᑦᔭᖏᑦᑐᖅ ᐊᓯᒋᔭᐅᔪᓂᒃ enterococci-ᒧᑦ, ᑭᓯᐊᓂ ᐊᑯᓂᐅᓂᕐᓴᖅ ᐋᓐᓂᐊᕕᒻᒦᒋᐊᖃᓲᑦ ᑲᒪᒋᔭᐅᓗᑎᓪᓗ ᑲᒪᒋᑦᓯᐊᕋᓱᐊᕆᐊᖏᑦ ᐱᔭᕆᐊᑐᓂᕐᓴᐅᓲᖑᒻᒪᑕ.
Clostridium difficile-Associated Diarrhea (CDAD) ᐃᑎᑦᑕᓇᕐᑐᐃᑦ
Clostridium difficile-associated diarrhea ᐃᑎᑦᑕᓇᕐᑑᕗᖅ ᖁᐱᕐᕈᑯᓘᑦᓱᓂ ᐋᓐᓂᐊᑎᑦᓯᓲᖑᕗᖅ ᐃᓅᑉ ᐃᕐᓱᖓᓂᒃ (ᐃᓇᓗᐊᑉ ᐃᓚᖓᓂᒃ). ᐃᓱᐃᓪᓕᖓᐅᑎᒋᔭᐅᓲᖑᕗᖅ ᐊᓇᖏᑦ ᐃᒣᓐᓇᐅᓕᑐᐊᕐᒪᑕ, ᐊᓇᕐᑕᖏᓪᓗ ᐊᕿᑦᑑᓱᑎᒃ, ᖃᓂᒪᑦᓱᓂᓗ ᓈᖕᖑᓱᓂᓗ. ᑕᒪᓐᓇ ᐋᓐᓂᐊᓕᕈᑕᐅᓗᐊᖑᐊᓲᕗᖅ ᐃᓄᑐᖃᕐᓄᑦ ᐊᒻᒪᓗ ᐱᕐᖃᔭᑦᓯᐊᖏᑦᑐᓄᑦ ᑌᒪᖕᖓᒐᓛᓪᓗ ᐋᓐᓂᐊᓯᐅᑎᑐᕐᑎᑕᐅᕐᖃᒥᐅᑦᓱᓂ. ᑕᒪᑦᓱᒪᐅᑉ ᖁᐱᕐᕈᑯᓗᖏᑦ ᑲᓚᓕᕐᑎᓯᒍᓐᓇᓲᑦ ᐊᑯᓂ ᑕᕐᕿᓂ ᓄᐃᑕᐅᒍᓐᓇᓲᓂᒃ ᐱᔭᕕᓂᐅᑐᐊᕋᒥ ᓇᔪᕐᑕᖏᓐᓂ (ᐊᓪᓕᓂᖓᓂᑦ, ᐃᓪᓕᐅᑉ ᐃᔪᒃᑲᕆᒃᑯᑎᖏᓐᓂᑦ, ᙯᖁᔨᒍᑎᓂᒃ ᓂᓂᕐᑕᐅᓲᓂᒃ, ᖁᕐᕕᒥᑦ ᐊᓯᖏᓐᓂᓗ). ᐃᓱᒪᒋᔭᐅᓯᒪᕗᖅ ᑕᒪᓐᓇ ᐃᑎᑦᑕᓇᕐᓂᖅ ᐱᔭᐅᓕᑐᐊᕐᒪᑦ ᑮᓇᐅᔭᕐᑐᕆᐊᓪᓚᑎᑦᓯᓲᖑᒋᐊᖏᑦ $3,700.00-ᕆᐊᓪᓚᓂᒃ ᐊᒻᒪᓗ ᐋᓐᓂᐊᕕᒻᒦᓂᖏᑦ ᐊᑯᓂᕐᓂᓴᐅᑦᓱᑎᒃ 3.6-ᓂᒃ ᐅᓪᓗᓂᒃ.